Siéntolo:STOP

Por razones personales esti blogue tien qu'aparar indefinidamente.Siéntolo muncho y aspero tornar esti proyeutu lo enantes posible.
Salú y lleémonos.

Caudal,l'espeyu del resurdir

El pasáu fin de selmana entamó una nueva temporada na 2ªB,colos tres equipos asturianos encuadraos nel grupu 2.Un Real Uviéu poderosu no deportivo y no económico qu’aspira al ascensu,un Sporting B col oxetivu de siguir surtiendo de perles el primer equipu,y un Caudal que torna a la categoría siete años depués.

Y ye nesti caberu equipu nel que güei vamos a aparanos,por tresmitir daqué distinto a los otros dos.A fin de cuentes,l’Uviéu ye un clú que ta de pasu na categoría,y l’Sporting B nun dexa de ser un filial,demientres que’l Caudal ye’l clú de la ilusión y de les ganes por caltenese nesta categoría a la que tanto costó aportar.

El Caudal ye una d’eses entidaes hestóriques del fútbol asturianu,que col pasu los años foi en decadencia,al mesmu tiempu que les perres del ladrillazu aupaba a los equipos mediterráneos a la tiesta’l panomara futbolísticu semiprofesional.Podríemos dicir que xunta l’Avilés y el Llangréu,ye una entidá con tradición y hestoria na categoría,cola diferencia de que l’Avilés y el Llangréu,frutu de los problemes económicos,güei tan viviendo momentos dificiles.El Caudal llogró caltener l’equilibriu,siguir lluchando añu tres añu p’algamar l’oxetivu de tornar a la 2ªB,y a la fin consiguiolo.

Sicasí,nun torna como un equipu “grandón” nin con grandes aspiraciones,sinon que torna col espíritu que pue representar el Marino de lluanco o el Ribeseya nel añu que debutó na categoría:poques perres,munchu compromisu,muncha ilusión,muncha motivación,ya una imprescindible bona capacidá de xestión pa poder lluchar escontra los tiburones.

Con too ello el Caudal apostó por xente del país,en munchos casos que tornen depués d’intentar desendolcar la so carrera n’equipos de fuera,y qu’amás de calidá y asequibilidá económica van poner dalgo imprescindible nun clú modestu:compromisu y ganes.

  

Asina,los Segura,Chus bravo,Nacho méndez,Invernón,Espolita,Aitor,Jorge,Camochu,
Salva,Nacho matador… xúnense a los héroes del ascensu y a una cantera de la que de xemes en cuandu sal dalguna perlla.A fin de cuentes una bona plantilla,un entrenador coles coses clares y una directiva nueva coles ganes y la fuerza pa consolidar al Caudal na división.

L’asturies futbolística humilde va tar puxando cada partíu col Caudal,asperando qu’esti añu repitase la hestoria y podamos ver otru ascensu,pa dir recuperando pasín a pasu el llugar que-y correspuende al nuesu fútbol,y que perdió por una época dorada de perres a mamplén que finó pa la mayoría de los equipos.

Dende equí apostamos a qu’esti ye l’añu del Caudal,que sirvirá como símbolu del resurdir del fútbol asturianu nes categoríes humildes.

Analís de los grupos de la "Champions league" (II)

GRUPU G

Bayern Múnich:Finalistes l’añu pasáu,el bloque de Van Gaal refuérzase col espectacular Toni Kroos,y con un renováu Ribéry que l’añu pasáu tuvo ausenteAspiren a ganar toles competiciones.
Nomes clave:Robben,Ribéry,Muller,Olic,Shweinsteiger,Lahm,Van buyten

AS Roma:El cantar de los caberos años nel fútbol italianu;xugadores que vienen de vuelta y que dan pa una competición.Antunes y Fabio Simplicio son los principales refuerzos.Adriano leite ye la otra novedá,nel enésimu intentu de tornar a ser xugador.Los de Ranieri tienenlo fácil pa llegar a octavos,y ehí quedarán.
Nomes clave:Totti,David Pizarro,Vucinic,Mexes,De rossi.

Basilea:Los suizos son un clásicu de la Champions.Nun ye la primera vegada que dan la surpriesa,y tienen dalguna opción.
Nomes clave:Constanzo,Frei,Chipperfield,Streller,Huggel.

Cluj:Los rumanos basen les sos posibilidaes na colonia sudamericana (xugadores brasileños y arxentinos).Les sos opciones son mínimes.
Nomes clave:Bjelanovic,Dica,Rafa Bastos,Kone.

Pronósticu:Bayern y Roma deberíen clasificase ensin problemes.La mayor resistencia tará nel Basilea de Frei,que paez insuficiente.

GRUPU F

O.Marsella:Los de Deschamps quieren llegar lloñe.Caltienen a tolos xugadores importantes del añu pasáu menos el goleador Niang.Si Gignac,fichaxe estrella,nun ye quién a sustituyilu van perder munchu potencial.Polo demás destaca la incorporación d’Azpilicueta y la continuidá del bloque campeón de francia.
Nomes Clave:Heinze,Mandanda,Lucho gonzález,Valbuena,Ben arfa,Cheyrou

Chelsea:Los xugadores de siempre -camudando a Ballack por Benayoun,procedente del Liverpool- con un añu más a les espaldes.El tiempu agótase pa una de les meyores xeneraciones de xugadores del clú londinense.L’oxetivu ye ganar,lo demás un fracasu.
Nomes clave:Terry,Lampard,Drogba.Malouda,Anelka,Obi Mikel,Ashley cole.

Spartak Moscú:La xeneración de xugadores rusos lideraos por Titov finó,y agora cunten con un bloque de xugadores onde la calidá ponenla los brasileños.Fuertes como locales,intentarán l’asaltu a los octavos.
Nomes clave:Pletikosa,Maidana,Welliton,Nico pareja,Ibson

MSK Zilina:Los eslovacos debuten na Champions.Van col oxetivu de disfrutar del carambelu y facelo lo meyor posible.
Nomes clave:Zosak,Majtán,Oravec,Piacek

Pronósticu:Chelsea primeru de grupu,Marsella segundu,Spartak terceru y MSK cuartu.Esi sedría l’orde lóxicu,anque la lóxica nel fútbol nun sirva de muncho.

GRUPU G

R.Madrid:Depués de cinco años siguíos eliminaos n’Octavos,el marxe de meyora del equipu de Mourinho ye más qu’evidente.Siempre hai que cuntar con ellos,pero fálta-yos atopar un estilu y,sobre too,el xugador afayaízu p’acompañar a Xabi Alonso nel mediu campu.Pienso que Khedira nun ye esi xugador.
Nomes clave:Casillas,Ramos,Cristiano ronaldo,Higuaín,Xabi alonso,Kaká (si resucita).

Milan:L’equipu favoritu de los xeriátricos entama nuevu proyeutu con Allegri na direición,ya Ibrahimovic y Robinho como incorporaciones importantes,xugadorazos con mala tiesta.Van ser decisivos xunta Pato pa que’l Milan torne a ser dalgo n’Italia y n’Europa.
Nomes clave:Pato,Ibrahimovic,Robinho,Seedorf,Thiago silva.

Ajax:L’ajax d’anguaño resúmese en dos pallabres:Luis Suárez.Ún de los meyores delanteros d’europa,qu’a la fin va tener la oportunidá de xugar na Champions.Va tar acompañáu pol “killer” El Hamdaoui,los esperimentaos De zeeuw y Tainio controlando’l centru’l campu y una lexón de xugadores mozos de los que van salir munches de les estrelles del futuru.Equipu interesante.
Nomes clave:Stekelenburg,Van der wiel,Vertonghen,Emanuelsson,De jong,Luis suárez.

Auxerre:Jean fernández ye perru vieyu nesto d’entrenar.Que l’Auxerre tea equí yá ye too un ésitu,asina que buscarán garrar esperiencia pa los xugadores mozos,dexase ver y,si se pue,surpriender.
Dependen d’unos xugadores mui concretos que nun van poder con dos competiciones al másimu nivel.
Nomes clave:Pedretti,Jelen,Le tallec,Ndinga,Cédric.

Pronósticu:Real madrid y Milan van tener nel Ajax l’únicu opositor,pero nun deberíen sufrir pa clasificase.

GRUPU H

Arsenal:El xuegu dinámicu de Wenger entama otru añu más la llucha,con Cesc,que sigui nel equipu,como gran fichaxe.Chamakh incorpórase a la delantera “de los gunners” y Squillaci a la defensa.Ye’l momentu de que los Nasri,Walcott,Vela y compañía dean el saltu de calidá.
Nomes clave:Cesc,Clichy,Diaby,Van persie,Arshavin,Sagna,Vermaelen,Denilson.

Shakhtar Donetsk:Tienen un equipu mui competitivu,reforzáu con Eduardo del Arsenal.Puen ser la revelación de la competición.
Nomes clave:Eduardo,Fernandinho,Chygrynsky,Srna,Luiz adriano,William.

S.Braga:Un equipu que quedó segundu na liga portuguesa y qu’eliminó al Sevilla na previa merez tenese en cuenta.Perdieron varies pieces clave,pero supieron rexenerase.Van esfrutar d’otra temporada hestórica.
Nomes clave:Meyong Zé,Madrid,H.Viana,Quim,Helder barbosa,Keita

Partizán:Nun ye mal equipu,pero van tenelo perdificil pa caltenese vivos más alló de la primer fase.De toes maneres podríen dar dalgún disgustu.
Nomes clave:Smiljanic,Kstajic,Jovanovic,Nemanja,Ilic,Iliev.

Pronósticu:L’Arsenal va ser amu y señor.A partir d’ehí too ye posible,anque apuesto a quel Shakhtar va ser l’excoyíu y que va ser un güesu nos octavos.

Hasta equí l’analís y pronósticu de los ocho grupos de Champions.

Analís de los grupos de la "Champions league" (I)

GRUPU A

Twente: La revelación de les caberes temporaes na Eredivisie faise mayor n’Europa.A priori ye la cenicienta del grupu debío a la perda de puntales como l’entrenador Steve Mcclaren o los delanteros N’kufo y Arnautovic.Caltienen al goleador Bryan ruiz-que nun tardará en dar el saltu a un grande-,que tará acompañáu pol pichichi austriacu Janko y pol centrocampista ofensivu Chadli,que vien de marcar 17 goles na segunda división.

Yá amosaron n’otres temporaes la so capacidá de rexeneración,pero paez dificil repetir el rendimientu de los dos años anteriores.

Nomes clave:Bryan ruiz,Janko,Bajrami,Chadli,Tiote.

Inter: Poco queda por dicir del caberu campeón.La gran novedá tará nel banquillu,onde Rafa benitez toma’l testigu de mourinho,colo que presumiblemente l’equipu nun va dormise.Sollertes a Coutinho,centrocampista de 18 años.

Nomes clave:Julio César,Eto’o,Milito,Sneijder,Lucio.

Werder Bremen:Poques novedaes na 12ª temporada de Schaaf entrenando al Werder.Pierden al emerxente Ozil,ganen esperiencia en defensa con Silvestre y dinamismu y xuventú n’ataque con Arnautovic.Continúen les referencies ofensives(Almeida y Pizarro) ya’l potente centru’l campu (Borowski,Frings,Hunt,Marko Marin).

Como siempres sedrán un rival perduru.

Nomes clave:Naldo,Almeida,Marko Marin,Pizarro,Hunt.

Tottenham:Novedaes escases pero de calidá.Sigui Redknapp capitaneando un barcu reforzáu col defensa Gallas,el centrocampista Van der vaart y col regresu de Giovanni dos santos y Robbie keane de les sos respeutives cesiones.Equipu completu y mui competitivu,la única dubia ye si sedrán capaces de salir vivos de la llucha pol cuartu puestu na Premier,polos octavos na champions y por llegar lloñe nes copes locales,toes elles competiciones con altísimu nivel de desixencia.

Nomes clave:Gomes,Modric,Defoe,Kranjcar,King,Van der Vaart.

Pronósticu:Col Twente en reconstrucción ya l’Inter en plan campeón,la dubia d’esti grupu ye quién va acompañar a los italianos nos octavos de final.Si’l Tottenham gasta munches fuerces nel campu batalla de la Premier league el Werder Bremen lleva les de ganar.

GRUPU B

O.Lyon:Depués de ser la surpriesa l’añu pasáu llegando hasta semifinales,esti añu van de nueu a por toes na Champions y na ligue 1,con claude puel entrenando por tercer añu consecutivu.Siguen casi toles estrelles,a les que se sumen el superclas Gourcuff,fichaxe estrella en francia(22 millones d’euros),y Briand,un atacante talentosu.Pierden al veteranu govou y al defensa Boumsong,titulares l’añu pasáu pero non imprescindibles.Sollertes al prometedor mediu defensivu Maxime Gonalons.

Nomes clave:Lloris,Lisando lópez,Toulalan,Michel Bastos,Gourcuff.

Benfica:Mal entamu na liga portuguesa.Depués de dominar la liga portuguesa l’añu pasáu,ye de suponer l’ambición del Benfica por dexase ver na champions.La cadarma liderada por Jorge Jesús refuérzase colos arxentinos Salvio y Gaitán.Los nomes prometen,veremos si’l rendimientu ye acorde.

Nomes clave:David luiz,Cardozo,Coentrao,Amorim,Javi garcía,Saviola,Luisao.

Schalke 04:L’equipu de moda dende que Raúl aportó.Jurado,Huntelaar y Metzelder son les otres novedaes nun equipu con pegada pero mui faltu d’imaxinación nel centru’l campu.Magath apuesta pol orde y la consistencia,pero la plantilla da pa lo que da.

Nomes clave:Raúl, Rakitic,Huntelaar,Farfán,Howedes.

Hapoel Tel-Aviv:A priori la cenicienta del grupu.El xugador más conocíu ye Ben sahar,nun equipu onde sólo hai cuatro xugadores foriatos.A esfrutar ya intentar surpriender.

Nomes clave:Ben sahar,Enyeama,Badeer.

Pronósticu:A priori,el Lyon debería algamar el primer puestu,lluchando pol segundu Benfica y Schalke04.Ente esos tres equipos tará la llucha.

GRUPO C

Manchester United:Otru añu más les novedaes son escases y poco rellumantes nel equipu de Ferguson.El prometedor “Chicharito” Hernández ye la gran novedá nun equipu nel que tirarán del carru los de siempre,asperando que Berbatov y Valencia dean el nivel que se-yos supón.Nunca nun hai que descartalos.

Nomes clave:Vidic,Rooney,Nani,Fletcher,Scholes,Van der sar.

Valencia:Torna un clásicu.Echarán en falta a Villa y Silva,sustituyíos por xugadores con fame como Soldado,Aduriz,Tino costa o Mehmet topal,que se sumen a los Mata,Vicente,Pablo hernández…Tienen argumentos p’aportar lloñe.

Nomes clave:Mata,Soldado,César,Banega,Aduriz,Joaquín

Glasgow Rangers:El campeón escocés básase nun esquema d’orde y disciplina demasiáu faltu de creatividá.Amás vendieron al delanteru estrella (Boyd),polo que siguir dominando n’escocia y facer un papel dignu n’europa sedrán los oxetivos de los protestantes.

Nomes clave:Walter Smith,Mcculloch,Kenny miller,Whittaker,Beattie

Bursaspor:Desconocíos nel restu d’europa,dalgo tendrán pa ganar la liga turca a los poderosos Fenerbahce,Galatasaray y Besiktas.Si Manchester y Valencia se despisten puen surpriender.

Nomes clave:Fede insúa,Yildirim,Erdogan,Ergic,Núñez

Pronósticu:Lo lóxico ye que pasen Manchester y Valencia,siendo’l Bursaspor l’alternativa más sólida.El Rangers poco tien que dicir.

GRUPU D

FC Barcelona:Ganen n’ataque con Villa y en contención con Mascherano.Si nun hai lesiones importantes na cadarma del equipu deberíen ser los campeones.

Nomes clave:Guardiola,Xavi,Iniesta,Messi,Piqué,Villa

Panathinaikos:A la fin foron a ganar la liga griega énte l’Olympiakos.Tienen un equipu curiosu,pa llegar a octavos y poco más.La gran llucha tará nel tornéu griegu.

Nomes clave:Cissé,Karagounis,Govou,Gilberto Silva,Boumsong,Leto

Rubin Kazan:L’añu pasáu casi da la surpriesa.Nos partíos caseros van ser un güesu perduru gracies al iviernu rusu,anque futbolisticamente nun son coxos.Van lluchar polos octavos.

Nomes clave:César Navas,Muravski,Tekke,Petr,Kasaev.

Copenhague:El campeón danés entama con poques opciones,pero nun hai que descartalos dafechu pal pase a octavos.Xuegu direutu y efeutivu.

Nomes clave:Gronkjaer,Bolaños,Delaney,De souza.

Pronósticu:El Barça tienlo perfácil pa quedar primeru.El segundu puestu ye cosa del restu,col Panathinaikos favoritu n’argumentos futbolísticos ya Rubin y Copenague pol factor casa.

Perfil: Fernando Cavenaghi

   Cavenaghi:Pueo y nun quiero

TRAYEUTORIA
CLÚ                                                   PARTÍOS    GOLES
(2010/?)Real Mallorca(cedíu)
(2007/2010)Bordeaux                                  111          46
(2004/2007)Spartak Moscú                           26            6
(2000/2004)River Plate                                  85          50

Fernando Cavenaghi (21/09/1983,Arxentina) ye ún d'esos xugadores colos que siempre queda la sensación de que pue dar muncho más nel momentu que quiera.Entamó la so carrera profesional nel River Plate,onde bien ceo convirtiose na referencia ofensiva de los "millonarios" gracies al so poderíu rematador,pesie a que nun ye un xugador especialmente altu (1,78 m).Foi parte d'una fornada de la que salieron otros xugadores como Javier Saviola,que colaron a europa enantes qu'elli.

Quiciabes el primer gran erru na so carrera deportiva foi'l desembarcu n'europa nuna de les ligues más complicaes p'adaptase,la rusa.Clima,estilu de xuegu,idioma...son munchos los factores que faen que la mayoría de los xugadores qu'aporten a esa liga dende fuera acaben fracasando,pero'l poderíu económicu adquiriu recientemente pol fútbol rusu,apadrináu polos oligarcas nacionales,fizo posible qu'ún de los delanteros con más futuru del mundu aportare al Spartak de moscú (previu pagu de 12 millones d'euros),onde fracasó estrepitosamente.Malapenes xugó,ya la so aportación foi testimonial.

Nel 2007 dio el saltu al Girondins de Burdeos,onde combinó dos campañes nes que cumplió ensin grandes númberos,cola so campaña más interesante nel fútbol européu,la 2008/2009,na qu'algamó 22 goles en 35 partíos na "Ligue 1",españando dafechu nel fútbol européu y siendo la estrella del ataque del equipu entrenáu por Laurent Blanc.Na temporada 2009/2010 tornó a uno númberos discretos,apagándose otra vegada la estrella del delanteru arxentín.

Esta temporada entama una nueva etapa,nuna edá ideal pa un delanteru,nel Mallorca de Laudrup,cedíu con opción de compra de 3,5 millones d'euros.Del rendimientu de Fernando va depender,en gran midida,el rendimientu del conxuntu mallorquín,que cola marcha d'Aduriz quedó coxu n'ataque.Los sos competidores van ser los africanos Keita y Webó,asina como xugadores de la casa como Sergi Enrich,Pereira y Nsue,prometedores pero inespertos.

Opinión:Tien una oportunidá d'oro pa españar dafechu nel fútbol européu,nuna de les tres ligues más potentes del mundu y nun equipu ideal,ensin presión y con xugadores xóvenes,dinámicos y un entrenador favoratible al xuegu ofensivu y de toque.Si l'equipu adopta un estilu afayaizu pal so xuegu de remate pue ser una de les revelaciones de la "Liga BBVA".Capacidá tien de sobra.

PSG:La hestoria interminable

Como un mal endémicu que repítese añu sí,añu tamién,l’entamu de temporada pal Paris Saint-Germain resúmese nuna pallabra:incógnita. Y ye que les perres gastaes en xugadores,la plantilla fecha,l’entrenador contratáu son factores que nun sirven pa con esti equipu parisín,que lleva 16 años ensin ganar la liga francesa.

Y ye que depués de tantes temporaes de fracasu tres fracasu,paez que’l clú va languideciendo non sólo en capacidá deportiva,sinón tamién na.Económicamente,pesie a recortes presupuestarios,sigui siendo ún de los clubes más potentes (el terceru en presupuestu aproximáu),pero nel tarrén deportivu el retrocesu ye manifiestu:yá nun ye una custión de nun ganar la liga,ye una custión de que’l meyor de les caberes temporaes ye un quintu puestu,convirtiéndose cada vegada en más habitual ver al PSG en posiciones baxes de la clasificación (l’añu pasáu quedaron nel puestu 14).

Les consecuencies no deportivo ye una ansiedá pol resultáu inmediatu qu’impide’l desendolcu de proyeutos deportivos a mediu-llargu plazu y con xugadores de futuru;la planificación nel tarrén deportivu cada vegada paez más un despropósitu,ensin un modelu nidiu que permita al clú parisín recuperar el prestixu perdíu.

Pa esta temporada,el PSG caltién al entrenador Antoine Kombouaré,al que-y dan una segunda oportunidá gracies a la victoria na copa la liga l’anterior temporada,al frenti d’un grupu de xugadores veteranos ya esperimentaos,en munchos casos na recta final de la so carrera deportiva.Asina,caltiénense na plantilla un bon númberu de vieyes glories,nunos casos puntales del equipu (Makelele,Giuly) y n’otros casos xugadores insustanciales,con altos sueldos y que nun aporten lo esperao (Coupet,Kezman,Luyindula),combinaes con xugadores xóvenes,dinámicos y con futuru como’l defensa Sakho (atención a esti central,con un futuru perinteresante) o’l centrocampista Chantóme (otru xugador que va llegar lloñe),otros de perfil mediu pero consolidaos na plantilla como Clément (volante polivalente y cumplidor),Séssegnon (una gota d’imaxinación nun mar de centrocampistes defensivos),Hoarau (delanteru cumplidor,meyor como revulsivu),el central Zoumana Camara (veteranu,cumple ensin más) o’l lateral Ceará (brasileñu,ye central pero nel PSG xuega nel lateral gracies al so nivel téunicu y bon físicu).pa finar,atopamos al turcu Erdinç,delanteru que l’añu pasáu marcó 15 goles na liga francesa,ye la referencia ofensiva del equipu parisín y el so nivel va n’ascensu.El PSG tien goles aseguraos con esti xugador de 23 años y 1,81 d’altura.

Respeuto a les novedaes pa esta temporada,Nené ye la gran apuesta,depués de que la temporada pasada marcara 14 goles nel mónaco,siendo una de les estrelles de la liga francesa.Ye un vieyu conocíu de l’afición de l’Alavés y l’Espanyol,mediapunta o interior izquierdu de carauter perofensivu,mui téunicu y atrevíu,que costó 5 millones d’euros.D’elli depende en gran midida’l rendimientu del PSG.

Otra incorporación importante ye la de Mathieu Bodmer,que vien del Lyon.Ye un centrocampista ofensivu,con muncha llegada a portería pero al que-y falta capacidá organizativa.Va a ser una referencia nel centru’l campu.

Si hai que facer un pronósticu,apostamos a que puede facer un bon papel na copa y na Europa League,pero na Ligue 1 asperamos más de lo mesmo:un equipu irregular y que va tener el techu nos puestos d’Europa league,mui lloñe de los “olympiques” (lyon y marsella),Girondins de burdeos o Toulouse (van dar que falar).Ye lo que-yos queda demientres nun se sienten los responsables deportivos y tracen un proyeutu a mediu plazu,evitando xugadores caros y en declive y apostando pola escelente y desaprovechada cantera parisina,les perles que tolos años surden na clas media de los equipos franceses (Saint ettiene,rennes,lille,auxerre…) ,ello combinao con dalgún fichaxe del estilu Nené o Bodmer (bones incorporaciones dambes) y,sobre too,con un centru’l campu qu’a la fin atope un “boss” que reparta y organice’l xuegu (Séssegnon nun ye mal parche temporal).

Siguiremos-yos la pista a lo llargo la temporada,y veremos si esti añu,a la fin,y depués de decenes de fichaxes,millones d’euros,entrenadores y años de llucha algamen el preciáu oxetivu:ganar la “Ligue 1”.Sedrá’l fin de la odisea que ta viviendo ún de los grandes del fútbol francés.

Yá tamos nel redes sociales

Como anunciamos ayeri,el contautu con vosotros va ser parte fundamental d'esti blogue,asina qu'al corréu lletrónicu sumamos Facebook,Ximiélgame y Twitter.En Facebook tamos col nome "Balones na rede",demientres qu'en Twitter somos "@balonesrede".

Na parte drecha del blogue tenéis tolos información sobre les víes de contautu,asina qu'asperamos la vuesa participación.

Mañana entamamos.